【新一年，新開始】石賈墨德語補習社

我終於都鼓起勇氣，搞咗個網上德文補習服務...

二零一七年，經過三四年低調嘅試驗，我終於鼓起勇氣，將自己嘅理念正式實踐出嚟。

我好希望讀德文，尤其係讀Grammatik讀得好辛苦嘅朋友唔好放棄。六年前我啱啱開始讀德文，我同你地一樣，覺得德文好難，讀大學，坊間嘅Course讀得好唔滿意...我自己有好多問題，不斷地問點解，但係無人（甚至我嘅德國老婆）可以答到我嘅問題，我自己花咗好多時間同心血，堅持用我嘅方法去尋找答案，寫咗一本超過一百三十頁嘅筆記，舊年八月，我終於考埋C2，完成咗自己嘅心願...

幾年前，機緣巧合之下，有個師弟搵我，向我訴苦，話讀德文讀得好辛苦，佢講嘅嘢勾起返我自己痛苦嘅回憶，所以我當時就同佢用兩個禮拜嘅時間，go through曬我成本筆記...結果佢同我講：依家返大學個Course，真係輕鬆咗好多，最後佢都成功考到DSH。

佢可以話係啓發咗我，自此之後，我就開始搵一啲想學德文嘅朋友，問下佢地想唔想補習。呢三四年嚟，都keep住睇下自己嘅教學方法，會唔會真係幫到人，並且不斷地問學生問題，refine返自己本筆記。

好好彩，我教過嘅學生，都鍾意我嘅教法。當然佢地都會有比feedback我，就係我畀得太少功課（但係畀咗佢地又唔做，哈哈），但係成個教法，睇得出係幫到佢地。

我其實自己喺德國做Engine佬，雖然做嘢做得好開心（因爲做R&D其實好好玩），但有時都幾忙。有諗過幾次放棄呢個副業，直接同學生講我要返工，cut曬全部補習學生，唔洗次次約補習嗰一日，都要晨咁早六點幾七點返到公司，先可以下晝早走，有時連lunch都要飛埋，先可以趕喺香港人訓教之前上堂（德國下午一點，即係香港晚上八點）。但係我每次同學生補完習之後，都會打消呢個念頭，因爲我feel到我嘅學生喺我身上真係學到嘢，嗰種開心同成功感，係同返工做出一隻行得走得嘅Prototype絕對有過之而無不及。

喺香港，如果想讀德文，有幾個選擇，可以上歌德，或者有個德國教授喺香港都有教德文，仲有啲持續進修學院嘅課程。佢地各有所長，質素肯定有保證。我都鼓勵大家如果想讀德文的話，補唔補我都好，不妨去試下上堂。但係如果你試過，覺得佢地教得雖然好，但係未必fit到你需要（教法，時間，地點等），可以睇下我嘅網站，如果你覺得我嘅教法可能會啱你的話，可以聯絡我。試完堂，唔鍾意我教法的話，又無所謂咖，你可以繼續搵其他方法學德文，最緊要你真係學到嘢。但係如果你係學到一半，覺得卡住卡住，尤其係Grammar唔通的話，我會覺得你同我之前啲學生一樣，都係有同樣問題，可能你上我堂你會上得開心。

如果你都有呢個問題，或者想同其他學德文嘅朋友喺呢度交流一下意見，都歡迎你留言啦！

有興趣的話，都可以去我個網站睇睇。