德國地方選舉2016 巴登符騰堡
早論香港因爲新界東補選，網上面因爲六七之爭，搞到沸沸騰騰。結果楊岳橋險勝，本土派都攞到出乎意料地多嘅選票。雖然見到今次補選咁熱鬧，但由於自己對政治真係認識唔多，加上自己唔喺香港，又唔係新界東選民，無票可投，所以都覺得有啲可惜。
對於補選嘅熱誠，喺無處發泄嘅情況下，唯有寄情德國政治。咁啱德國今年有幾個州做緊地方選舉，而小弟身處嘅巴登符騰堡Baden-Württemberg，亦都係屬於呢幾個州之一。剛好尋日投票完咗，點票亦都完成，爲咗俾機會鞏固一下自己對於德國政治嘅認識，就順手寫返幾個可以同香港比較，又幾有趣嘅重點。
 |
| 巴登符騰堡今年地方選舉結果 |
港豬vs德豬 之 Wahl-O-Mat
同香港唔同，德國民主你如果從德國革命計起，都有成超過一百年歷史，成個社會個民主程度都高到離曬譜。所以德國嘅年輕人根本唔需要對政治有咩認識或者參與。有啲甚至連票都唔想投，因爲自己一嚟認識唔多，二嚟佢地好清楚，兩個大黨都係有鐵票，德國人都係走穩穩陣陣嘅路綫，所以你投唔投票，對於成個局勢未必有好大影響（當然其實咁講係唔啱嘅，而我地今年就見到個原因）。有時真係好諷刺，香港政府話：有票，你真係唔要？係，香港人就叫啲有票唔投，政治冷感嘅香港人爲港豬，有啲德國人真係一模一樣，成隻“德豬”咁，有得揀都唔做老闆。
 |
| Wahl-O-Mat，圖中係第二條問題，問應唔應該起多啲風力發電機 |
所以德國政府除咗賣廣告，叫下人投票之外，仲有搞咗個網上工具，叫“懷澳擘”Wahl-O-Mat，實在諗唔到一個有意思嘅譯名，或者可以叫“自助投票選擇機”啦。Wahl-O-Mat其實就係一份網上問卷，有一連串大約四十條年輕人關心嘅問題，你可以選擇你嘅立場：贊成，反對，定中立，最後仲可以選擇幾條對你嚟講特別重要嘅問題，增加計算比重。而呢啲問題，都係預先送去畀各大政黨，等佢地將立場同解釋一一寫清楚。咁你填完問卷之後，系統就會計算你嘅成個取態，同邊一個政黨嘅取態最爲相似，並且列出曬你嘅立場同其他所有政黨嘅立場嘅相似率，順便可以睇埋政黨嘅解釋。咁樣，啲“我討厭政治”嘅“德豬”，都可以響好短時間入面，搵到一個適合自己嘅政黨，增加返佢地對於投票嘅參與度。
小弟係香港人，雖然已經住咗德國一段時間，但係唔係德國人，無德國護照，自然無得投票。不過出於好奇心，自己都花咗啲時間玩咗一轉Wahl-O-Mat，結果令人好驚訝，我嘅票（如果可以投的話）既然會去咗一個近來幾熱門嘅右翼政黨德國另類選擇黨AfD。我真係得啖笑。不過呢個結果就證明到，Wahl-O-Mat都唔係萬能，因爲呢啲問題雖然都幾重要同幾熱門，但係就未必可以好真實反映到成個政黨嘅取態同立場。比如話有一條問題係問，夜晚十點之後，應唔應該禁止賣酒精飲品。老老實實，賣又點，唔賣又點呢？佢唔去問德國應唔應該用歐元（可能呢條問題實在太針對AfD），而去問呢啲問題，我覺得有啲無謂，可能真係因爲年輕人成日買酒飲？雖然佢都有問一啲重要問題，好似話：應唔應該加設資產稅？咁呢啲問題就可以好清楚咁將左右政黨分割出嚟。但係整體嚟講我覺得Wahl-O-Mat衹有一個好基本嘅指標性作用，真係投唔投得落，其實係要花心機去考慮，唔能夠單純憑幾條問題就可以得出終極答案。
掌心雷 vs 兩個交叉 之 ”右膠“陷阱
香港有阿婆被人用膠紙貼掌心雷，確保盲字都唔識多隻嘅阿婆都會”行正路“。掌心雷，其實就係指導啲公公婆婆投票，老實講，真係好陰功，好低級。德國人就高班啦，佢地知道，好多極右份子，其實根本無咩政治理論，佢地可能因爲幾乎弱智，搵唔到嘢做，就好受啲極右政黨青睞，因爲容易呃，容易洗腦，就話外國人搶佢地飯碗，啲同性戀搞到德國風氣敗壞，所以呢類人，通常都係大大聲，話要殺滅外國人，殺滅難民，殺滅同性戀…其實佢地根本無腦。
睇清楚呢個事實之後，左翼作出一流反擊：佢地唔會派膠，逼公公婆婆貼響手上面。而係用滲入敵後嘅方法：網上流傳出好多張圖，圖文并茂，叫右翼朋友，不單止要支持一個右派，更要支持其他盟友，以壯大德國右翼力量咁解。就咁睇係圖好正常，但上面寫住第一票要投AfD，第二票要投NPD。由於德國有地方選舉同大選，而大選係要投候選人加政黨，所以大選係要兩票的。但係巴符州嘅地方選舉，衹需要投候選人一票咁多（當然大部分候選人都有政黨背景）。啲無腦的”右膠“見到，真係會落搭，結果響選票上面打兩個交叉，結果？成爲廢票一張。我唔清楚呢一招令到幾多人投咗廢票，但竟然呢兩個政黨真係出返貼文，反駁返呢啲略爲有腦嘅人都唔會信嘅僞裝文，教返啲右膠，一定衹能投一票。咁你就知道，其實呢招係高嘅…
 |
| 第一票投AfD，第二票投NPD，兩個右翼政黨一齊贏！（笑） |
我想講嘅係，我認爲香港有兩個政黨好值得市民支持：民建聯行正路，趕絕拉布議員，撥亂反正。工聯會，維護工人權益，支持高鐵基建。大家記得，要出盡全力支持，淨係支持一個政黨係唔足夠令議會拉布現象停止，請各位記得同所有可以投票嘅市民，尤其係公公婆婆講，要投票，就一定要同時支持民建聯同工聯會，如果有埋經民聯，自由黨呢啲好政黨，一定要一籃子支持！記得打印嘅時候，要打得足，一個係唔夠的！見到老人家手上有投票指導，教人投票，係好事，唔好搣落嚟，貼多一張上去就得啦！
香港爆箱風雲 vs 弗賴堡Freiburg造票風波
香港呢一邊有個“爆箱”造票疑雲，另一邊巴登符騰堡都有一個預先造票疑雲。
 |
| Freiburg市政廳畀人Cap圖，見到投票之前已經有結果。而且仲係符合執政黨心水嘅數字！ |
德國好多選區嘅地方市政廳都有網上報票系統，畀人可以實時睇到點票情況。香港就有得實地睇點票，但係無官方嘅網上公佈。有德國佬發現，弗萊堡Freiburg嘅網上報票系統，唔知點解早於投票前一日，已經有投票結果！隔世追凶，回到未來！？最重要嘅係，今次明明聲勢浩大嘅另類選擇黨，得4.9%票，咁啱得咁橋低過5%嘅門檻，一席都無，符合執政黨嘅願望。弗萊堡市政廳話係測試結果不慎公佈。咁到底係造票結果不慎公佈，定真係測試結果不慎公佈呢？如果係測試，點解唔全部都用無意義嘅數字呢？最後該區投票結果，都同成個州分好相似，所以相信好多人都信佢無造馬。但事實如何，無人知。就好似新界東打唔開要爆個投票箱咁，人家硬係要撈埋落去點，入面到底全部都係6號，定全部都係7號，定全部都係廢票，定真係正常票箱一個？無人知。
高鐵 vs 斯圖加特21
高鐵同斯圖加特21其實有好多相似嘅地方。不過呢個火車站大白象工程，到底應唔應該起，爭議性好大，我好難下定論，民意都係一半一半。唔似得香港條26公里高鐵，一地兩檢，造價，環保問題，經濟效益呢啲重點根本政府無解釋過，政府成日話有做咨詢，有好多考慮，有民意支持。唔好話你試下攞出嚟公投，就係財委會泛民大戰橄欖，你都知民意爲何。
 |
| 大約54公里，造價四百億港幣左右，包一個新火車站，值唔值？ |
睇返德國，其實德國綠黨Die Grüne走環保反核有機路綫，淨係講成個潮流趨勢，老早已經成功上位，因爲堅守反對斯圖加特21呢個計劃嘅立場，更加吸納咗一大堆鐵票，撈埋巴符州州長嚟做（雖然最後公投，有六成人反對停工，其實最後係呢個”大白象“火車站得到勝利，但六成人支持，其實係險勝咁解，所以反對者一定會票投綠黨）。加埋福島核事故帶出反核呢啲議題，不分左中右，好多中產，年輕人都會支持。所以今次選舉，綠黨成爲咗大贏家。
同樣地，本土派對於高鐵嘅立場，都一定會成爲佢地吸納年青選票嘅力量。
反蝗蟲 vs 反難民
香港真係好獨特，政治上都係。理論上我地會話左翼係關注基層利益，求大同。右翼係向特權階級傾斜，排外爲多。香港所謂嘅建制派，比人叫做左派，唔覺得佢地關注基層利益之餘，又好鍾意外地人（當然佢地會話内地人係中國人，血濃於水之類…）反而香港叫内地人做蝗蟲嗰啲，明明排外叫右派，但又會叫自己左翼。
德國就比較正路，自從敘利亞打仗之後，走咗幾多敘利亞，阿富汗之類嘅難民嚟德國。本來都無咩問題，最慘係德國怕政治不正確，就算有證據表明難民參與新年響科隆同其他地方嘅性罪行都好，政府，報紙都唔夠膽報出嚟，結果搞到好多人好唔順氣，好想叫啲難民返屋企。所以AfD明明之前話到明自己唔排外，祇係希望德國可以用返馬克，唔用歐元。但係單一議題，自然好難上位，之前佢未出位嘅時候，出街買嘢，竟然有個AfD嘅人想撩我嗲，我心諗你右派見到外國人，一嚟唔啱你口味，二嚟我十成九都無得投票，你做咩撩我。返屋企睇清楚，先知道當時佢係”經濟右派“。到依家見到德國人開始有人唔鍾意難民，就食住條水，變成真正右派。德國選舉有呢個百分之五嘅門檻，所以之前就算佢支持率有三四個百分比都好，始終入唔到任何一個議會。今次響巴符州，自然通過排外殺出一條血路。
所以好理性嘅分析係，但凡一個地方因爲外地人干擾，令到本地人生厭嘅時候，有得投票嘅人一定會揀”右派“。九月香港立法會選舉，走本土路綫嘅政黨，所得嘅票一定唔會少。
總結
睇返成個結果，其實都算係好多人意料之内。
梅克爾所領導嘅CDU，係老牌大黨，上一次2011選，本來佢都坐定粒六，有成四成票。但係今次有綠黨用環保議題上位，又有德國另類選擇黨用難民議題異軍突起，真係左右不是人。所以今次歷史性輸比綠黨，好大原因係因爲一大堆人對CDU同SPD嘅難民立場不滿，啲票去咗AfD度，而SPD雖然叫做中間偏左，本來係第二大黨，但係因爲佢立場同CDU相似，所以啲票都畀CDU吸收曬。
根據往史，默大媽最勁係玩吸收政綱，本來佢都想玩核電，但係因爲佢見到綠黨上位，所以就話2020德國無核化，好聽啲係順應民意，唔好聽係打到昨日的我，見”票“駛舵。所以我估計就算AfD入到佢，都唔會搞得起咩風浪，好快默大媽就會認輸，認同減少難民，管制邊境之類AfD提出嚟嘅政策。
17.03.2016 另注：
對於AfD有無爭CDU嘅票，有唔同睇法，有人認爲AfD吸引咗好多“首投族”，情況好似香港投本民前嘅後生仔咁。但純粹用得票正負百分比係唔夠的。當然AfD吸引咗好多“右膠”投票，佢地之前因爲覺得大黨無咩特色，CDU唔夠右，另一個FDP又係被CDU吸收而死亡，所以一路都不滿，難得今次有右派可以投，當然會造成首投效果。但係大家唔可以唔知嘅，就係FDP上次大選因爲同CDU越走越近，所以造成兩者差距更加收近，FDP理論上會走FDP後路，好多票比CDU吸收。所以理論上今次選舉，應該此FDP消，彼CDU長。所以單憑CDU嘅得票百分比無變而話AfD無吸CDU票，唔係幾啱。
另外一個無提到嘅原因，點解綠黨咁成功，其實要歸功返比Winfried Ketschmann呢個綠黨州長。本來綠黨走環保，大麻合法化，有機之類嘅路綫，係會有個熱血形象，搵啲後生仔嚟玩，有啲反對派嘅味道。但係佢表現出穩陣，成熟嘅魅力，啲中產覺得佢好有Taste屎，所以票源更加廣闊。
